الهوا ساقع و ما يشجعش علي أي نشاط إنساني.انا من مواليد الشتا و مع ذلك انا إبنة غير بارة و متمردة علي غيامه,يملاني شجن و وحدة مهما كان حواليا ناس.

ظبطت كباية كاكاو-كباية شفافة مش مج سيراميك يخبي الدفا عني-و قفلت عليا باب آودتي.الدنيا تلج برة فقررت إني اقرا واحدة من رواياتي المفضلة اللي مكانها تحت مخدتي,"نون" لسحر الموجي.

"نون"هتخليك تشوف مع سارة-بطلتي المفضلة-إن فعلا "لسه في سحر في العالم" في أبسط الحاجات,قعدة علي النيل و القمر بدر،حضن دافي،أغنية بتحبها.

سامحوني أنا مش ناقدة،بس حبيت الحالة اللي بعيشها مع سارة/نورا/دنيا/حتحور. لو طالباها فلفسة هقولك ان الأربع ستات دول كيان واحد و مراحل خبرة و مطبات لخبطة في حياة أي حد فينا.

لو طلباها بساطة و عمق هقولك أن الحميمية و التمرد في الرواية دي ممكن يلعبولك في تلافيف دماغك و يظبطولك الفيوزات اللي صدت من الهم!

هقولك انها بتعزف علي وجعي و وجعك بمنتهي الرقة و تخليك تحبه عشان الألم بيطهرك و يخليك تغير مقاس نضارتك و تشوف الحكاية اوضح والتفاصيل ملونة.

انا عن نفسي، لقيتني في كل واحدة فيهم.
تهت مع احزان و انتصارات سارة الليبرالية.بكيت مع دنيا اللي لسة بتدور علي نفسها جواها عشان تعرف تحتوي اللي براها.و غضبت من نورا اللي مصرة و مصممة انها تقتل كل حاجة حلوة جواها.

بعدين بقي قلت يا بت الحكاية هنا غويطة أوي جوانا.كأن سحر مسكت ألمنا بقلمها و حررت ارواحنا من شوية اشباح كاتمة أصواتنا.

و كل ما أقرا أكتر احس بباب المعبد بيبان من بعيد و بأن سلم الكهانة يقطع النفس آه! بس بيحضن روحك، ينضفها و يرجعها شفافة.

الدفا اللي في كلام دنيا و سارة و نورا ، الحكمة و الحنية اللي في عيون حتحور.كل ده غرقني في أمان و ثقة إن بكرة هيبقي أحلي و أدفا.قفلت الرواية و قبل ما أنام سمعت صوت جوايا بيقولي "السحر و الدفا جواكم كلكم..دوروا عليهم و نفضوا التراب."_